பாகிஸ்தான் தீவிரவாதத்திற்கு எதிரான உரிய நடவடிக்கை எடுக்காததால் அந்நாட்டு ராணுவத்திற்கு வழங்கப்பட்டு வரும் மேலும் நிதியுதவியை அமெரிக்கா நிறுத்தியுள்ளது.கடந்த 2002-ம் ஆண்டு முதல் தீவிரவாதத்தை ஒழிப்பதற்காக பாகிஸ்தான் ராணுவத்துக்கு ஆண்டுதோறும் அமெரிக்கா நிதியுதவி வழங்கி வருகிறது. இதுவரை ரூ.2.14 லட்சம் கோடி வழங்கி உள்ளது. ஆனால் தீவிரவாத அமைப்புகளை ஒழிப்பதில் பாகிஸ்தான் தீவிரமாக செயல்படவில்லை என்ற குற்றச்சாட்டு நிலவுகிறது. ஆப்கானிஸ்தான் அரசுக்கு எதிராக உள்நாட்டுப் போரில் ஈடுபடும் தலிபான்களுக்கு பாகிஸ்தான் ஆதரவு அளிப்பதாக குற்றம்சாட்டப்பட்டு வருகிறது.
இதையடுத்து பாகிஸ்தானுக்கு கடும் கண்டனம் தெரிவித்த அமெரிக்க அதிபர் டொனால்டு ட்ரம்ப் கூறுகையில் “தீவிரவாத ஒழிப்பில் பாகிஸ்தான் பொய்களை மட்டுமே கூறிவருகிறது. அமெரிக்காவை ஏமாற்றி வருகிறது. பாகிஸ்தானின் நடவடிக்கைகளை இனிமேலும் பொறுத்துக் கொள்ள முடியாது” என்று பகிரங்கமாக குற்றம் சாட்டினார்.
இதைத்தொடர்ந்து, தீவிரவாத எதிர்ப்பு நடவடிக்கைக்காக பாகிஸ்தானுக்கு வழங்கப்பட்டு வந்த ரூ.1,621 கோடி நிதியுதவியை முதல்கட்டமாக அமெரிக்கா நிறுத்திவைத்தது. இது, பாகிஸ்தானுக்கு கடும் பின்னடைவை ஏற்படுத்தியது.
இந்நிலையில், பாகிஸ்தானுக்கு பாதுகாப்பு காரணங்களுக்காக வழங்கப்பட்டு வரும் மேலும் நிதியை நிறுத்துவதாக அமெரிக்கா நேற்று (வியாழன்) அறிவித்துள்ளது. எனினும், அது எவ்வளவு தொகை என்ற விவரத்தை அறிவிக்கவில்லை.
பாகிஸ்தான் ராணுவ பணிகள், ஆப்கானிஸ்தான் போரில் பாகிஸ்தானின் ஒத்துழைப்பு உள்ளிட்டவற்றிக்கு வழங்கப்பட்டு வரும் நிதி நிறுத்தப்படுவதாக தெரிகிறது. எனினும், கடந்த 2017ம் ஆண்டில் பாகிஸ்தானுக்கு, தீவிரவாத குழுக்களுக்கு எதிரான நடவடிக்கை உட்பட பல வழிகளிலும் வழங்கப்பட்ட சுமார் 6,000 கோடி ரூபாய் அளவிற்கு நிதி வழங்கியுள்ளது. அந்த நிதி தற்போது நிறுத்தப்படும் என தெரிகிறது.
இதுகுறித்து அமெரிக்க ராணுவ தலைமையகமான பென்டகன் செய்தித்தொடர்பாளர் பேட்ரிக் இவான்ஸ் கூறுகையில் ‘‘பாகிஸ்தான் ராணுவம் மற்றும் பாதுகாப்பு காரணங்களுக்காக வழங்கப்பட்ட நிதியை சரிவர பயன்படுத்தவில்லை என தெரிய வந்துள்ளதால், அதை நிறுத்தி வைக்க முடிவு செய்துள்ளோம். ஆனால் இது மாற்றத்திற்குரியது தான், பாகிஸ்தானின் நடவடிக்கையில் மாற்றம் தெரிந்தால் மீண்டும் நிதியுதவி வழங்க தயாராக உள்ளோம்’’ எனக்கூறினார்.
Post a Comment