அப்பா - மகன் முதன்முறையாக இணைந்து நடிக்கும் படம்

நடிகர் கார்த்திக்கும், அவரது மகன் கவுதம் கார்த்திக்கும் இணைந்து நடிக்கும் படத்தை "நான் சிவப்பு மனிதன், தீராத விளையாட்டு பிள்ளை, சமர்" படங்களை இயக்கிய திரு இயக்குகிறார். இந்தப் படத்தை இவன் தந்திரன் படத்தை தயாரித்த கிரியேட்டிவ் என்டர்டைனர்ஸ் நிறுவனம் தயாரிக்கிறது. இதுகுறித்து தயாரிப்பு நிறுவனம் விடுத்துள்ள செய்தி குறிப்பில் கூறப்பட்டிருப்தாவது:

பல வருடங்களுக்குப் பிறகு ஒரு பிரபல கதாநாயகனும், அவரின் மகனும் இணைந்து நடிக்கும் படமாக இது உருவாகிறது. கார்த்திக் அவரின் மகனுடன் இணைந்து நடிக்கும் படி பலர் கேட்டும் அவர் ஒப்புக்கொள்ளவில்லை. ஒரு நல்ல கதை இருந்தால் மட்டுமே இணைந்து நடிப்பதாக இருந்தவர் இயக்குனர் திரு கதையை சொல்லியதுமே நடிக்க சம்மதம் தெரிவித்தார்.

கார்த்திக் மற்றும் கௌதம் கார்த்திக் இருவருடன் இரண்டு பிரபல கதாநாயகிகளும் மேலும் பல பிரபல நடிகர்களும் நடிக்க உள்ளனர். படத்தின் தலைப்பு முடிவு செய்யப்பட்டு விரைவில் அறிவிக்கப்படும். இப்படத்தின் தொழில்நுட்ப கலைஞர்கள் விவரங்களும் தெரிவிக்கப்படும்.

கார்த்திக் மற்றும் கௌதம் கார்த்திக் இருவரும் ஒட்டுமொத்தமாக தேதிகளை கொடுத்துள்ளனர். எனவே ஒரே கட்டமாக இப்படத்தின் படப்பிடிப்பு நடக்க இயக்குனர் மற்றும் தயாரிப்பு குழு முன்னேற்பாடுகளை செய்து வருகிறது.