அமெரிக்காவின் துணை ஜனாதிபதியாகும் கமலா ஹரிஸ்!

அமெரிக்காவில் 2021ஆம் ஆண்டில் ஜனாதிபதியாகத் தகுதி பெற்றுள்ள ஜோ பைடனின் அரசில், கமலா ஹரிஸ் துணை ஜனாதிபதியாகும் தகுதியைப் பெற்றிருக்கிறார் .

அமெரிக்க துணை ஜனாதிபதி பதவிக்கு தேர்வான முதல் கறுப்பின மற்றும் முதல் ஆசிய அமெரிக்க பெண்ணான கமலா ஹரிஸ் தமிழகத்தை பூர்வீகமாக கொண்டவர். 

அமெரிக்க ஜனாதிபதித் தேர்தல் நவம்பர் 03ஆம் திகதி நடைபெற்றது.

இவர் ஜனநாயக கட்சி சார்பில் ஜனாதிபதி வேட்பாளராக அறிவிக்கப்படுவதற்கான உள்கட்சி போட்டியில் கடுமையாக ஈடுபட்டு தோற்றவர்.

இதையொட்டி கமலா ஹரிஸுக்கும், குடியரசு கட்சி துணை ஜனாதிபதி வேட்பாளர் மைக் பென்ஸுக்கும் ஒக்டோபர் 07ஆம் திகதி விவாதம் நடைபெற்றது. அமெரிக்காவில் இதற்கு முன்பு இரண்டு முறை மட்டுமே பெண்கள், துணை ஜனாதிபதிப் பதவிக்கு போட்டியிட்டுள்ளனர். 

2008ஆம் ஆண்டு குடியரசுக் கட்சியின் சார்பாக சாரா பலினும், 1984ஆம் ஆண்டு ஜனநாயகக் கட்சியை சேர்ந்த ஜெரால்டின் பெரொரோவும் போட்டியிட்டுள்ளனர். ஆனால் இவர்கள் வெற்றி பெறவில்லை. டிசெம்பர் மாதம் ஜனநாயகக் கட்சிக்குள் நடந்த ஜனாதிபதி வேட்பாளர் போட்டியில் தோல்வி அடைந்த நிலையில் துணை ஜனாதிபதி வேட்பாளராக அறிவிக்கப்பட்டார் கமலா ஹரிஸ்.

அமெரிக்காவின் இரு முக்கிய கட்சிகளான குடியரசு கட்சி மற்றும் ஜனநாயக கட்சி இரண்டுமே ஜனாதிபதி வேட்பாளராக கருப்பின பெண்ணை நிறுத்தியதில்லை. இதுவரை யாரும் துணை ஜனாதிபதியாக இருந்ததும் இல்லை.

கமலா ஹரிஸுக்கு 55 வயதாகிறது. கமலா ஹரிஸின் தாய் தமிழகத்தைச் சேர்ந்தவர். தந்தை ஜமைக்காவை சேர்ந்தவர். அவரது உறவினர்கள் சென்னையில் வசிக்கிறார்கள். இவர்களின் பூர்விகம் தமிழ்நாட்டின் திருவாரூரில் உள்ள துளசேந்திரபுரம்.

கமலாவின் பெற்றோர் விவாகரத்து பெற்றப்பின் கமலா ஹரிஸ், அவரின் தாய் சியாமளா கோபாலன் ஹரிஸால் வளர்க்கப்பட்டார் . கமலாவின் தாயார் புற்றுநோய் குறித்த ஆராய்ச்சியாளர் மற்றும் சிவில் உரிமை ஆர்வலர்.

கமலாவின் தாயார் இந்தியாவிற்கு செல்லும் போதெல்லாம் கமலா ஹரிஸ் அவருடன் இந்தியாவிற்கு பயணம் செய்துள்ளார். 

கமலா ஹரிஸ் ஹாவார்ட் பல்கலைக்கழகத்தில் கற்றவர். நான்கு வருட ஹாவார்ட் பல்கலைக்கழக படிப்புக்கு பின் கமலா கலிபோர்னியா பல்கலைக்கழகத்தில் சட்டம் பயின்றார். பின்னர் அலமேடா கவுண்டியின் மாவட்ட அட்டர்னி அலுவலகத்தில் தனது பணியை தொடங்கினார்.

2003ஆம் ஆண்டு சான்ஸ்பிரான்ஸிஸ்கோ மாவட்டத்தின் அட்டர்னி ஜெனரல் ஆனார். அதன்பிறகு அதிக மக்கள் தொகை கொண்ட கலிபோர்னியாவின் சட்ட மா அதிபரானார். மேலும் கலிபோர்னியாவின் முதல் பெண் மற்றும் முதல் ஆபிரிக்க அமெரிக்க பெண் சட்ட மா அதிபர் என்ற சிறப்பையும் அவர் பெற்றார்.

இரு முறை சட்ட மா அதிபராக இருந்த கமலா ஹரிஸ் ஜனநாயகக் கட்சியின் வளரும் நட்சத்திரமாக அறியப்பட்டுள்ளார்.