ஏப்ரல் முதல் அமுலுக்கு வரும் சேவைகள் ஏற்றுமதி வரி!

தற்போதைய சூழ்நிலையில் சேவைகள் ஏற்றுமதி வரியை அமுல்படுத்துவதைத் தவிர அரசாங்கத்திற்கு வேறு வழியில்லை என அமைச்சரவைப் பேச்சாளர் நலிந்த ஜயதிஸ்ஸ தெரிவித்துள்ளார். 

வாராந்த அமைச்சரவை தீர்மானங்களை அறிவிக்கும் ஊடகவியலாளர் சந்திப்பில் கலந்து கொண்டு உரையாற்றும் போது அவர் இதனை தெரிவித்தார். 

இதற்கு முன்னர் அதிக வரி விதிப்பு முன்மொழியப்பட்டதாகவும் சுட்டிக்காட்டினார். சேவைகள் ஏற்றுமதி வரியை அமல்படுத்தாவிட்டால் மக்கள் இன்னும் கடுமையான வரியை எதிர்கொள்ள வேண்டிய நிலைக்குத் தள்ளப்படுவார்கள். 

அரசாங்க வருவாயை அதிகரிப்பதற்காக பொதுமக்களுக்கு மேலும் சுமையை ஏற்படுத்தாமல் வரையறுக்கப்பட்ட வரி முறையை அமல்படுத்த வேண்டும். இது தொடர்பாக நிதி அமைச்சு ஏதேனும் சலுகை வழங்க முடியுமா என்பதை நாங்கள் பரிசீலிப்போம்.

அரசாங்கத்தின் 2025 வரவு-செலவுத் திட்டம் வெளித்தரப்பினருக்கு சேவைகளை வழங்கி அந்நிய செலாவணியை திரும்பக் கொண்டுவரும். இலங்கையில் உள்ள தனிநபர்கள் மற்றும் பெரும்நிறுவனங்களுக்கு 15 சதவீத சேவை ஏற்றுமதி வரியை 2025 ஏப்ரல் 01 முதல் நடைமுறைப்படுத்த உத்தேசித்துள்ளதாகவும் அவர் தெரிவித்தார்.