ஒருநாள் போட்டிகளில் முதலிடத்தை பிடிப்பது யார்?

சர்வதேச கிரிக்கெட் கவுன்சிலின் ஒருநாள் போட்டிகளுக்கான தரவரிசையில், முதலிடத்தை பிடிப்பதற்கு கடும் போட்டி நிலவுகிறது. அணிகளுக்கான தற்போதைய தரவரிசையில் தென்னாபிரிக்கா 119 தரப்புள்ளிகளுடன் முதலிடத்தில் உள்ளது.

அவுஸ்திரேலியா, இந்தியா ஆகிய அணிகள் தலா 117 தரப்புள்ளிகளுடன் சமநிலை வகித்தாலும், புள்ளிகள் அடிப்படையில் அவுஸ்திரேலியா (5,505) 2ஆவது இடத்திலும், இந்தியா (5,266) 3ஆவது இடத்திலும் உள்ளன.

இந்த நிலையில், இந்திய – அவுஸ்திரேலிய அணிகளுக்கிடையே நடைபெறவுள்ள 5 போட்டிகள் கொண்ட ஒருநாள் போட்டித் தொடரின் முடிவைப் பொறுத்து தரவரிசையில் மாற்றங்கள் ஏற்படும் வாய்ப்புள்ளது.

இந்த தொடரை இந்தியா 4-–1 என்ற கணக்கில் கைப்பற்றும் பட்சத்தில், முதலிடத்தைப் பெறும். அதே சமயம் 3-–2 என்ற கணக்கில் வென்றால் 2ஆவது இடத்துக்கு முன்னேறலாம். அவுஸ்திரேலிய அணி 5–0 அல்லது 4-1 என்ற கணக்கில் வெற்றி பெற்றால், அந்த அணி முதலிடத்துக்கு முன்னேற முடியும்.