தென்னாபிரிக்காவை வீழ்த்திய பங்களாதேஷ்!

ஐ.சி.சி.12 ஆவது உலகக் கிண்ணத் தொடரின் ஐந்தாவது போட்டி நேற்று மாலை 3.00 மணிக்கு தென்னாபிரிக்கா மற்றும் பங்களாதேஷ் அணிகளுக்கிடையே லண்டன் ஓவல் மைதானத்தில் ஆரம்பமானது.

தென்னாபிரிக்க அணிக்கு எதிரான இப்போட்டியில் பங்களாதேஷ் அணி 21 ஓட்டத்தினால் வெற்றிபெற்றுள்ளது.

நாணய சுழற்சியில் வெற்றிபெற்ற தென்னாபிரிக்க அணி களத்தடுப்பை தெரிவு செய்தது. இதன்படி முதலில் துடுப்பெடுத்தாடிய பங்களாதேஷ் அணி நிர்ணயிக்கப்பட்ட 50 ஓவர்களின் முடிவில் 6 விக்கெட்டுக்களை இழந்து 330 ஓட்டங்களை குவித்தது.

331 ஓட்டம் என்ற வெற்றியிலக்கை நோக்கி பதிலுக்குத் துடுப்பெடுத்தாட ஆரம்பித்த தென்னாபிரிக்க அணி நிர்ணயிக்கப்பட்ட 50 ஓவர்கள் முடிவில் 8 விக்கெட்டுக்களை இழந்து 309 ஓட்டங்களை பெற்று 21 ஓட்டத்தினால் தோல்வி பெற்றது.

தென்னாபிரிக்க அணிசார்பில் டீகொக் 23 ஓட்டத்தையும், மக்ரம் 43 ஓட்டத்தையும், டூப்பிளஸ்ஸி 62 ஓட்டத்தையும், டேவிட் மில்லர் 38 ஓட்டத்தையும், வேன்டெர் டஸன் 41 ஓட்டத்தையும், ஆண்டில் பெஹல்குவே 8 ஓட்டத்தையும், கிறிஸ் மோரிஸ் 10 ஓட்டத்தையும், தென்னாபிரிக்க அணியின் நம்பிக்கை நட்சத்திரமாக திகழ்ந்த டூமினி 45 ஓட்டத்துடனும் ஆட்டமிழந்ததுடன் ஆடுகளத்தில் ரபாடா 13 ஓட்டத்துடனும், இம்ரான் தாகீர் 10 ஓட்டத்துடனும் ஆட்டமிழக்காது இருந்தனர்.

பந்து வீச்சில் பங்களாதேஷ் அணிசார்பில் முஸ்தபிசூர் ரஹ்மான் 3 விக்கெட்டினையும் மெஹமட் சைஃபுடின் 2 விக்கெட்டினையும், மெய்டி ஹசான், சஹிப் அல்ஹசன் தலா ஒரு விக்கெட்டினையும் வீழ்த்தினர்.