கால் இறுதியில் சானியா ஜோடி!

சின்சினாட்டி ஓபன் டென்னிஸ் தொடரில் மகளிர் இரட்டையர் பிரிவில் இந்தியாவின் சானியா மிர்சா, சீனாவின் பெங் ஷாய் ஜோடி கால் இறுதிக்கு முன்னேறியது.

அமெரிக்காவின் சின்சினாட்டி நகரில் நடைபெற்று வரும் இந்த தொடரில் ஆடவர் ஒற்றையர் பிரிவு 2-வது சுற்றில் இந்தியாவின் ராம்குமார் ராமநாதன், அமெரிக்காவின் ஜார்டு டொனால்டுசனை எதிர்த்து விளையாடினார். இதில் ராம்குமார் 4-6, 6-2, 4-6 என்ற செட் கணக்கில் தோல்வியடைந்தார்.

போட்டித் தரவரிசையில் முதலிடத்தில் உள்ள ஸ்பெயினின் ரபேல் நடால் 6-3, 6-4 என்ற நேர் செட்டில் பிரான்சின் ரிச்சர்டு காஸ்குட்டை வீழ்த்தி 3-வது சுற்றுக்கு முன்னேறினார். 4-ம் நிலை வீரரான ஜெர்மனியின் அலெக்சாண்டர் ஜிவெரேவ் 6-4, 3-6, 4-6 என்ற செட் கணக்கில் அமெரிக்காவின் பிரான்செஸ் டியோபோவிடம் தோல்வியடைந்தார்.

மகளிர் இரட்டையர் பிரிவில் இந்தியாவின் சானியா மிர்சா, சீனாவின் பெங் ஷாய் ஜோடி, 7-5, 6-4 என்ற நேர் செட்டில் ஜெர்மனியின் ஜூலியா ஜார்ஜ், உக்ரைனின் ஓல்கா சவுசுக் ஜோடியை வீழ்த்தியது. சானியா ஜோடி கால் இறுதியில் ருமேனியாவின் இரினா, ரலூகா ஒலரு ஜோடியை எதிர்கொள்கிறது. - ஐஏஎன்எஸ்