ஸ்கொட்லாந்து அணியை வீழ்த்திய மேற்கிந்திய தீவுகள்!

கொல்கத்தாவின் ஈடன் கார்டன் மைதானத்தில் நேற்று நடைப்பெற்ற 2026 ரி20 உலகக் கிண்ணத் தொடரின் 2-வது லீக் ஆட்டத்தில் ஸ்கொட்லாந்து அணியை 35 ஓட்டங்களால் வீழ்த்தி மேற்கிந்திய தீவுகள் அணி வெற்றிப் பெற்றுள்ளது. 

இப்போட்டியில் நாணய சுழற்சியில் வென்ற ஸ்கொட்லாந்து அணி முதலில் பந்துவீச்சைத் தேர்வு செய்தது. இதன்படி மேற்கிந்திய தீவுகள் அணி முதலில் துடுப்பெடுத்தாடியது. 

நிர்ணயிக்கப்பட்ட 20 ஓவர்கள் முடிவில் மேற்கிந்திய தீவுகள் அணி 5 விக்கெட் இழப்பிற்கு 182 ஓட்டங்களைப் பெற்றது.

ஷிம்ரோன் ஹெட்மையர் 36 பந்துகளில் 64 ஓட்டங்களையும், பிரண்டன் கிங் 35 ஓட்டங்களையும், அணித்தலைவர் ஷாய் ஹோப் 19 ஓட்டங்களையும் பெற்றனர். 

ஸ்கொட்லாந்து தரப்பில் பிராட் கியூரி 2 விக்கெட்டுகளையும், சபயான் ஷெரீப், மைக்கேல் லீஸ்க் மற்றும் ஓலிவர் டேவிட்சன் ஆகியோர் தலா ஒரு விக்கெட்டையும் வீழ்த்தினர். 

183 ஓட்டங்கள் எடுத்தால் வெற்றி என்ற இலக்குடன் பதிலுக்கு துடுப்பெடுத்தாடிய ஸ்கொட்லாந்து அணி 18 ஓவர்களில் அனைத்து விக்கெட்டுக்களையும் இழந்து 147 ஓட்டங்களை மாத்திரமே பெற்றது. 

ஸ்கொட்லாந்து அணி சார்பில் ரிச்சி பெரிங்டன் 42 ஓட்டங்களை அதிகபட்சமாக பெற்றார். 

பந்து வீச்சில் ஜேசன் ஹோல்டர் மூன்று விக்கெட்டுக்களையும் மற்றும் ரொமாரியோ ஷெப்பர்ட் 5 விக்கெட்டுக்களையும் வீழ்த்தினர்.