அத்துடன், பல்கலைக்கழக வளாகத்தினுள் இவ்வாறான சம்பவங்களைத் தடுக்க உடனடி நடவடிக்கை எடுக்குமாறும் நீதிமன்றம் பணித்துள்ளது.
பேராதனை பல்கலைக்கழக பல் மருத்துவ பீடத்தின் பீடாதிபதி பேராசிரியர் டபிள்யூ.ஏ. திலகரத்னவிடம் முதுதத்துவமாணி (M.Phil) பட்டத்தைப் பயின்று வந்த அதே பீடத்தைச் சேர்ந்த இரண்டாம் தர விரிவுரையாளர் ஒருவரால் தாக்கல் செய்யப்பட்ட அடிப்படை உரிமை மீறல் மனு மீதான தீர்ப்பை அறிவித்த போதே உயர்நீதிமன்றம் இந்த உத்தரவைப் பிறப்பித்தது.
நீதிமன்றத்திற்கு வழங்கப்பட்டுள்ள நீதி மற்றும் சமத்துவ அதிகாரத்தின் அடிப்படையில் இந்தத் தீர்ப்பை வழங்கிய உயர்நீதிமன்றம், பேராசிரியர் டபிள்யூ.ஏ. திலகரத்ன பல்கலைக்கழகக் கட்டமைப்பிலோ அல்லது ஏதேனும் உயர்கல்வி நிறுவனங்களிலோ எந்தவொரு பதவியையும் அல்லது கௌரவப் பதவியையும் வகிப்பதைத் தடை செய்துள்ளது.
உயர்நீதிமன்ற நீதியரசர்களான ஜனக் டி சில்வா, அச்சல வெங்கப்புலி மற்றும் பிரியந்த பெர்னாண்டோ ஆகிய மூவர் அடங்கிய நீதியரசர்கள் குழாம் முன்னிலையில் இந்த மனு விசாரணைக்கு எடுத்துக் கொள்ளப்பட்டது.
பல் வைத்தியர் உதாரி அபேசிங்கவினால் தாக்கல் செய்யப்பட்ட இந்த மனுவில், முதலாவது பிரதிவாதியாக பேராசிரியர் டபிள்யூ.ஏ. திலகரத்ன பெயரிடப்பட்டிருந்ததுடன், பல்கலைக்கழக உபவேந்தர் மற்றும் செனட் சபை உறுப்பினர்களும் பிரதிவாதிகளாகக் குறிப்பிடப்பட்டிருந்தனர்.
குறித்த பேராசிரியர், மனுதாரரான விரிவுரையாளருக்கு அவ்வப்போது பாலியல் துன்புறுத்தல்களை இழைத்து வந்துள்ளார். இது குறித்து விரிவுரையாளரின் தாயாரால் பேராதனை பல்கலைக்கழக அதிகாரிகளுக்கு முறைப்பாடு செய்யப்பட்டது. அந்த முறைப்பாட்டின் அடிப்படையில் நடத்தப்பட்ட உள்ளக விசாரணையில், பேராசிரியர் மீதான குற்றச்சாட்டுகள் சில நிரூபிக்கப்பட்டிருந்தன.
குற்றச்சாட்டுகள் நிரூபிக்கப்பட்ட போதிலும் அவருக்கு எதிராக பல்கலைக்கழக செனட் சபை எவ்வித நடவடிக்கையும் எடுக்கவில்லை என்பது நீதியரசர் ஜனக் டி சில்வா வழங்கிய தீர்ப்பில் சுட்டிக்காட்டப்பட்டுள்ளது. இந்நிலையிலேயே, பாதிக்கப்பட்ட பெண்ணின் உரிமைகளைப் பாதுகாக்கும் வகையில் உயர்நீதிமன்றம் இந்த வரலாற்றுச் சிறப்புமிக்க தீர்ப்பை வழங்கியுள்ளது.
Post a Comment