முன்னாள் ஜனாதிபதி ரணில் வழங்கிய பொது மன்னிப்பு சட்டவிரோதமானது!

முன்னாள் ஜனாதிபதி ரணில் விக்ரமசிங்க, செப்டம்பர் 2024 இல் பொது மன்னிப்பின் கீழ், நபருக்கு வழங்கப்பட்ட 29 மாத சிறைத்தண்டனை குறைப்பு சட்டவிரோதமானது என்றும், அது அரசியலமைப்பினால் உத்தரவாதம் அளிக்கப்பட்ட சமத்துவத்திற்கான உரிமையையும், சட்டத்தின் சமமான பாதுகாப்பையும் மீறியுள்ளது என்றும் உயர்நீதிமன்றம் தீர்ப்பளித்துள்ளது. 

நீதியரசர்கள் ஜனக் டி சில்வா, கலாநிதி சோபித ராஜகருணா மற்றும் சம்பத் கே.பி. விஜேரத்ன ஆகிய மூவர் அடங்கிய நீதியரசர்கள் குழாம், பராமரிப்புப் பணத்தை செலுத்தத் தவறியதற்காக, சிறையில் அடைக்கப்பட்ட மற்றொரு நபரை விட, இந்த நபர் எந்தவொரு நியாயமான அல்லது நியாயப்படுத்தக்கூடிய அடிப்படையுமின்றி மிகவும் சாதகமாக நடத்தப்பட்டுள்ளதாகத் தீர்ப்பளித்தது. 

பராமரிப்புப் பணத்தை செலுத்தத் தவறிய ஒருவருக்கு முழுமையான தண்டனை குறைப்பு வழங்கப்பட்ட நிலையில், மற்றொருவருக்கு ஒரு வாரக் குறைப்பு மட்டுமே வழங்கப்பட்டது அரசியலமைப்பின் கீழ் உத்தரவாதம் அளிக்கப்பட்ட சமத்துவ உரிமைகளை மீறுகிறது என்று உயர்நீதிமன்றம் கூறியுள்ளது. 

பராமரிப்புப் தொகையை செலுத்தத் தவறியதற்காக தண்டனை அனுபவித்த மற்றொரு நபருக்கு ஒரு வார மன்னிப்பு மட்டுமே வழங்கப்பட்ட நிலையில், இந்த நபரின் சிறைக்காவல் பிடியாணையில் அவரது தண்டனை "அபராதம்" செலுத்தத் தவறியதாக விவரிக்கப்பட்டதால் அவர் முன்னுரிமை சிகிச்சையைப் பெற்றுள்ளார் என்று நீதிமன்றம் குறிப்பிட்டுள்ளது. 

இரு நபர்களும் பராமரிப்புப் தொகையை செலுத்தத் தவறியதற்காகவே சிறையில் அடைக்கப்பட்டிருந்ததால், பிடியாணைகளின் சொற்களின் அடிப்படையில் செய்யப்பட்ட இந்த வேறுபாட்டிற்கு எந்தவொரு சட்டபூர்வ அடிப்படையுமில்லை என்று நீதிமன்றம் தீர்ப்பளித்துள்ளது. 

முன்னாள் ஜனாதிபதி, நீதி அமைச்சின் செயலாளர் மற்றும் சிறைச்சாலைகள் ஆணையாளர் நாயகம் ஆகியோர் அரசியலமைப்பின் 12(1) பிரிவை மீறும் வகையில் செயற்பட்டுள்ளதாக உச்சநீதிமன்றம் தீர்ப்பளித்துள்ளது. 

கொழும்பு கிழக்கு காதி நீதிமன்றத்தில் இருந்து தனது முன்னாள் கணவரிடம் இருந்து மொத்தம் 60,000 ரூபா பராமரிப்புத் தொகையைப் பெறுவதற்கான உத்தரவைப் பெற்ற அஹமத் ஜலீல் ஃபார்மிலா பேகம் என்பவர் தாக்கல் செய்த அடிப்படை உரிமை மனுவை விசாரணயிலேயே நீதிமன்றம் இந்தத் தீர்ப்பை வழங்கியுள்ளது. 

காதி நீதிமன்ற உத்தரவுக்கு இணங்கத் தவறியதைத் தொடர்ந்து, நீர்கொழும்பு நீதவான் நீதிமன்றம் 1.74 மில்லியன் ரூபா நிலுவை பராமரிப்புத் தொகைக்கான அமலாக்கச் சான்றிதழை வெளியிட்டது. அதனைத் தொடர்ந்து மனுதாரரின் முன்னாள் கணவருக்கு 29 மாத சிறைத்தண்டனை விதிக்கப்பட்டு, ஜூலை 2024 இல் சிறையில் அடைக்கப்பட்டார். இருப்பினும், சிறைச்சாலையாளர் தினத்தை முன்னிட்டு அப்போதைய நீதி அமைச்சரினால் வழங்கப்பட்ட பொது மன்னிப்பு பரிந்துரையைத் தொடர்ந்து, அவரது எஞ்சிய தண்டனை குறைக்கப்பட்டு, செப்டம்பர் 12, 2024 அன்று அவர் விடுவிக்கப்பட்டார்.

இந்தத் தண்டனை குறைப்பானது தன்னிச்சையானது என்றும், நிலுவையிலுள்ள பராமரிப்புப் பணத்தை மீளப் பெறுவதற்கான வாய்ப்பை இது தடுத்துள்ளதாகவும் வாதிட்டு மனுதாரர் பின்னர் இதனை சவாலுக்கு உட்படுத்தினார். 

மேலும், பராமரிப்புத் தொகையை செலுத்தத் தவறியதற்காக சிறையில் அடைக்கப்பட்ட மற்றொரு நபரான முகமது பைசல் முகமது நவ்ஷாத் என்பவருக்கு இவ்வாறான சலுகை கிடைக்கவில்லை என்றும் அவர் வாதிட்டார். 

பொது மன்னிப்பு வழங்கப்படும் போது நவ்ஷாத் தனது 27 மாத சிறைத்தண்டனையில் சுமார் எட்டு மாதங்கள் சிறைத்தண்டனை அனுபவித்திருந்த போதிலும், அவருக்கு ஒரு வாரக் குறைப்பு மட்டுமே கிடைத்தது என்பதை நீதிமன்றம் தெரிவித்துள்ளது.