தனியார் எரிபொருள் நிறுவனங்கள் விநியோகத்தை கட்டுப்படுத்தினால் சட்டநடவடிக்கை!

தனியார் எரிபொருள் நிறுவனங்கள் தொடர்ந்து எரிபொருள் விநியோகத்தைக் கட்டுப்படுத்தி நுகர்வோரை அசெளகரியத்துக்கு உள்ளாக்கினால், அதற்கு எதிராக சட்டப்பூர்வமாக எடுக்கக்கூடிய அனைத்து நடவடிக்கைகளும் எடுக்கப்படும் என வலுசக்தி அமைச்சர் அநுர கருணாதிலக்க தெரிவித்துள்ளார்.

கம்பஹாவில் ஊடகங்களுக்குக் கருத்து தெரிவிக்கும் போது அவர் இதனைத் தெரிவித்துள்ளார்.

உலக சந்தையில் எரிபொருள் விலை உயர்ந்துள்ள போதிலும், அதற்கு இணையான சதவீதத்தில் இலங்கையில் எரிபொருள் விலை உயர்த்தப்படவில்லை என்றும், எரிபொருள் விலை உயர்வில் பெரும் பகுதியை அரசாங்கமே மானியமாக ஏற்றுக்கொண்டுள்ளதாகவும் அவர் சுட்டிக்காட்டியுள்ளார்.

எரிபொருள் விலை 10 ரூபாவால் உயரும் போது, அரசாங்கம் 70 ரூபாவை மானியமாக வழங்குகின்றது என்பதை யாரும் பேசுவதில்லை. உலக சந்தையில் எரிபொருள் விலையேற்றத்திற்கு இணையான தொகையை நாம் இங்கு உயர்த்தவில்லை.

தற்போதுள்ள பொருளாதார சூழ்நிலையைக் கருத்திற்கொண்டு, இந்த விலை உயர்வின் ஒரு பகுதியைத் தாங்கிக்கொள்ளுமாறு தனியார் நிறுவனங்களுக்கு அறிவுறுத்தப்பட்டுள்ளது.

ஆனால், சில தனியார் எரிபொருள் நிலையங்கள் விநியோகத்தைக் கட்டுப்படுத்தி நுகர்வோரை அசெளகரியத்திற்கு உள்ளாக்க முயற்சிக்கின்றன. அவர்கள் கோரும் அளவுக்கு விலையை உயர்த்தி நுகர்வோரைப் பாதிக்க நாங்கள் ஒருபோதும் அனுமதிக்க மாட்டோம்.

ஒப்பந்தங்களின்படி விலை சூத்திரம் அல்லது செலவு அடிப்படையிலான விலையேற்றத்திற்குச் செல்ல அவர்களுக்கு வாய்ப்புள்ளது. ஆனால், அவர்கள் தொடர்ந்து விநியோகத்தைக் கட்டுப்படுத்தி மக்களுக்கு அசெளகரியத்தை ஏற்படுத்தினால் சட்டப்படி எடுக்கக்கூடிய அனைத்து நடவடிக்கைகளையும் எடுப்போம் என தெரிவித்துள்ளார்.